नेपालमा खोप लगाउनेको संख्या १ करोड नाघ्यो 

काठमाण्डाै – नेपालमा काेभिड–१९ (कोरोना भाइरस) विरुद्धको खोप लगाउनेको सङ्ख्या एक करोड नाघेको छ ।

२४ घण्टामा (एकै दिन) दुई लाख ९३ हजार एक सय ५१ मात्रा खोप लगाएसँगै कोरोनाविरुद्धको खोप लगाउनेको सङ्ख्या एक करोड ९२ हजार एक सय ६४ जना पुगेको स्वास्थ्य तथा जनसङ्ख्या मन्त्रालयले जनाएको छ ।

खोप लगाउनेमध्ये ४६ लाख ६७ हजार तीन सय २८ जनाले पूर्ण मात्रा र ५४ लाख २४ हजार आठ सय ३६ जनाले पहिलो मात्रा खोप लगाएका छन् । खोप योग्य जनसङ्ख्यामध्ये १५ दशमलव चार प्रतिशतले पूर्ण मात्रा र १७ दशमलव नौ प्रतिशतले पहिलो मात्रा खोप लगाएका छन् ।

सरकारले कुल जनसङ्ख्याको ७१ प्रतिशत नागरिकलाई कोरोनाविरुद्धको खोप लगाउने लक्ष्य लिएको छ । अहिलेसम्म एक करोड ३३ लाख मात्रा कोरोनाविरुद्धको खोप नेपालमा प्राप्त भैइसकेको र थप खोप आउने क्रममा रहेको स्वास्थ्य मन्त्रालयको खोप शाखाका प्रमुख डा. झलक शर्मा गौतमले जानकारी दिएका छन्।  

सरकारले अहिले ४० वर्षमाथिको उमेर समूह, विद्यार्थी, अत्यावश्यक सेवामा संलग्न लगायतलाई प्राथामिकतामा राखेर खोप लगाइरहेको छ । उज्यालो 

हिमाली जिल्ला मनाङ र मुस्ताङका सबै खोपयोग्य व्यक्तिलाई कोरोनाविरुद्धको खोप लगाइसकिएको छ भने हिमाली क्षेत्रमा रहेका कतिपय पालिकामा पनि सबैलाई खोप लगाइसकेको मन्त्रालयले जनाएको छ ।