ठुला नेता नेता सपार्न हलोमा भोट हालौं - लिङ्गदेन (तस्बिरहरु)

म्याग्दी। राष्ट्रिय प्रजातन्त्र पार्टीका अध्यक्ष राजेन्द्र लिंग्देनले काँग्रेस, एमाले र माओबादीका कार्यकर्ताहरुले आफ्नो दल र दलका नेताहरुलाई सुधार्नका लागि भएपनि राप्रपालाई जिताउन आवश्यक भएको बताएका छन् । यो पटक जनताले परिवर्तन चाहेको हुँदा राप्रपालाई जिताउन आग्रह गर्दै उनले हलोलाई सबै पार्टीको साझा चुनाव चिन्ह बनाउन अनुराेध गरे ।

म्याग्दी बेनीमा राप्रपाद्वारा आयोजित आमसभालाई सम्बोधन गर्दै उनले परिवर्तन र विकास देख्न चाहनेहरुको साझा पार्टी राप्रपा मात्रै भएको दाबी गरे । उनले काँग्रेस, एमाले र माओबादीका कार्यकर्ताहरुलाई देशको विकास र परिवर्तनका लागि यो पटक मत परिवर्तन गर्ने हिम्मत गर्न आग्रह समेत गरे । ‘तपाईहरु साँच्चै आफ्नो पार्टीको माया मान्नुहुन्छ र पार्टीका नेताहरु सुध्रियोस् भन्ने चाहनुहुन्छ भने यो पटक राप्रपाको चुनाव चिन्ह हलोमा मत हाल्नुहोला। हामी साँच्चिकै यो देशको विकास गर्नलाई आएका हौँ ।’ उनले भने -‘यसो गर्दा हजुरको दल र त्यसमा आबद्ध नेतृत्व सुध्रिने मौका पाउँछ ।’

उनले दल परिवर्तन नगरि मत मात्रै परिवर्तन गर्दा देश विकास पनि हुने र पार्टीहरु सुध्रिने भएकोले जनतासँगै अन्य पार्टीका कार्यकर्ताहरुले पनि यो कुरा बुझन् जरुरी भएको तर्क गरे । ‘यसो गरेमा अब जनता बाठो भयो, नसुध्रिँदा सम्म कुनै उपाय छैन भन्ने चेत अहिलेका नेताहरुको दिमागमा घुस्छ । र, उनीहरु नसुध्रिँदा सम्म सुख पाउँदैनन् ।’ उनले भने ।

साथै उनले पछिल्लो स्थानीय चुनावमा काठमाण्डौमा बालेन र धरानमा हर्क साम्पांगलाई जिताएर जनताले परिवर्तन चाहेको संकेत दिईसकेको बताए । अहिलेकै पार्टी र नेतृत्वबाट परिवर्तन हुन्छ भन्ने कुरा पत्याउन सकिने आधार नभएको बताउँदै लिंग्देनले सबैभन्दा राष्ट्रबादी पार्टी राप्रपाबाट त्यो संभव भएको बताए । ‘अहिले भ्रष्टाचारलाई सामान्य रुपमा लिने गरिन्छ । तर त्यसो होईन। भ्रष्टाचारकै कारण देशमा विकास हुन सकेको छैन । तर हामी चाँही भ्रष्टाचार गरेर खानु आमाको रगत खानु बराबर भएको ठान्छौँ ।’ उनले भने -‘म राप्रपाको अध्यक्षको हैसियतमा भन्दैछु, राप्रपाले यो जुनी त के अर्को जुनीमा पनि भ्रष्टाचारको राजनीति गर्दैन । किनभने म दोस्रो जुनी पाएको व्यक्ति हुँ, म फगत केही दिन बाँच्न मात्र आएको होईन, गरेर देखाउनलाई आएको हुँ ।’

राप्रपा अध्यक्ष लिंग्देनले चुनाव लक्षित देशदौडाहा अन्तरगत मंगलबार म्याग्दीको बेनीमा पुगेर आमसभालाई सम्बोधन गरेका हुन् । त्यो भन्दा अगाडि उनी कुश्मा पर्वतमा भएको एउटा कार्यक्रममा सहभागी भएका थिए । त्यस्तै लिंग्देनले गण्डकी प्रदेशस्तरिय राप्रपा नेता तथा कार्यकर्ताहरुसहित बागलुंगको कालिका मन्दिरको दर्शन समेत गरेका थिए । अध्यक्ष लिंग्देनले बुधबार स्यांग्जाको पुतलीबजारमा हुने आमसभा सम्बोधन गर्ने कार्यक्रम रहेको राप्रपा कास्कीका प्रवक्ता अरुण गिरीले जानकारी दिएका छन् ।