कोशी प्रदेशको सभामुख पद बजारमा बिक्री गर्न राखिएको माल जस्तो- भक्ति सिटौला

कोशी प्रदेश राप्रपा संसदीय दलका नेता तथा पुर्व मन्त्री भक्ति प्रसाद सिटौलाले कोशी प्रदेशको सभामुख पदलाई सत्ता पक्षले बजारमा बिक्री गर्न राखिएको माल जस्तो भएको टिप्पणी गरेका छन् । 

सत्ता गठबन्धनले सभामुख पद लिनका लागि प्रस्ताव गरे छलफल गरेर निष्कर्षमा पुग्ने उनले बताउदै सांसद सिटौलाले सत्ता पक्षले सभामुख पदको गरिमा बुझ्न नसकेको आरोप लगाएका हुन् । 

राप्रपालाई अहिलेसम्म सभामुख पद लिनको लागि प्रस्ताव नआएको बताए । 

 ‘सत्ता पक्षले प्रस्ताव गर्यो भने हामी त्यसको मुल्याङ्कन गर्छौं ।’, नेता सिटौलाले भनेका छन् । 

नयाँ सरकार टिकाउन र भत्काउन एक सांसद निर्णायक रहेको कोशी प्रदेशमा सभामुख पद कसले लिने भन्ने टुंगो लाग्न सकेको छैन । 

उद्धव थापालाई मुख्यमन्त्रीमा दाबी पेश गर्न बहुमत पुर्‍याउनका लागि सभामुख बाबुराम गौतमले राजीनामा दिएपछि हाल कोशी प्रदेशसभामा सभामुख पद रिक्त छ ।

साउन १६ गते नियुक्त भएका मुख्यमन्त्री थापाले भदौ १३ गते भित्र विश्वासको मत लिनुपर्नेछ । बहुमतका लागि आवश्यक संख्या ठिक्क मात्रै भएका कारण सत्ता गठबन्धनले फेरि सभामुख पद लिन चाहेको छैन । उसले सभामुख लिएको अवस्थामा बहुमतका लागि चाहिने संख्या भन्दा एक सिट कम हुनपुग्छ ।

त्यस्तै प्रतिपक्षी दल नेकपा एमाले र राप्रपा पनि सभामुख लिन तयार छैनन् । उनीहरुलाई थाहा छ अहिले सभामुख लिनु भनेको सत्ता गठबन्धनलाई बहुमत सुरक्षित गर्न सघाउ पुर्‍याउनु हो ।

अर्कोतर्फ सभामुख नलिएको अवस्थामा मुख्यमन्त्री थापाले विश्वासको मत पाउन नसकेर संविधानको धारा १६८ को उपधारा ३ बमोजिम ठूलो दलको हैसियतले एमाले नेतृत्वमा नयाँ सरकार बन्ने सम्भावना छ । यसरी सत्तापक्ष र प्रतिपक्ष दुबैले लिन नचाहेका कारण सभामुख पद फालाफाल भएको हो ।

निवर्तमान सभामुख बाबुराम दाहालले सभामुखबाट राजीनामा दिएर आर्थिक मामिला मन्त्री बनेका छन् । उनी माओवादी केन्द्रको कोटाबाट सभामुख बनेका थिए । 

यसैबीच मुख्य मन्त्री उद्वब थापाले विश्वासको मत लिने दिन नजिकिदै छ । जोड घटाउ मिलाउन र मुख्य मन्त्रीलाई असफल पार्नकै लागि एमालेले उपसभामुखलाई राजीनामा गराउने चर्चा चलेको छ । 
कोशीमा हाल उपसभामुख नेकपा एमालेकी सिर्जना दनुवार छिन् । प्रदेशसभामा सभामुख र उपसभामुख दुबै नभएमा ज्येष्ठ सदस्यले बैठक सञ्चालन गर्नुपर्छ । ज्येष्ठ सदस्य गयानन्द मण्डल बुधबार नै राज्यमन्त्री नियुक्त भएका छन् । उनीपछि एमालेका रोहितबहादुर कार्की ज्येष्ठ सदस्य छन् ।

गठबन्धन सरकार टिकाउन सभामुख पद लिइदिन सत्तापक्षले प्रतिपक्षी दल राष्ट्रिय प्रजातन्त्र पार्टी (राप्रपा) लाई आग्रह गरेको भएपनि उसले सभामुख पद लिन नचाहेको स्पष्ट देखिएको छ । 

९३ सदस्यीय प्रदेश सभामा सत्तारुढ गठबन्धनसँग ४७ मत मात्रै छ । जुन कठिन बहुमत हो । प्रदेश सभाको बैठक भदौ १ गतेबाट सुरु हुँदैछ । सभामुखले राजीनामा दिएका कारण अबको बैठक उपसभामुख सिर्जना दनुवारले चलाउनेछिन् ।

उनी अनुपस्थित भएको खण्डमा सभामुख र उपसभामुखको अनुपस्थितिमा प्रदेशसभा सञ्चालन गर्न बनाइएको अध्यक्ष मण्डलका सदस्यले बैठक सञ्चालन गर्नुपर्नेछ । अध्यक्ष मण्डलमा राप्रपाबाट अम्बरबहादुर विष्ट, एमालेबाट मालती सुब्बा, कांग्रेसबाट इस्राइल मन्सरी र माओवादी केन्द्रबाट गीता तिम्सिना सदस्य छन् ।

एमाले र राप्रपाबाट अध्यक्ष मण्डलमा बसेका सांसद बैठक सञ्चालनको जिम्मेवारी लिन चाहदैनन् । सत्ता पक्षका सांसदले बैठक सञ्चालनको जिम्मेवारी लिए मुख्यमन्त्री उद्धव थापाले विश्वासको मत पाउँदैनन् ।

भदौ १ गतेबाट सुरु हुने बैठकले पहिले बजेट अध्यादेश टुङ्गो लगाउनेछ । बजेट अध्यादेश टुङ्गो लगाएर उपयुक्त समयमा विश्वासको मत लिने मुख्यमन्त्री उद्धव थापाको तयारी छ । 

 

९३ सदस्यीय प्रदेशसभामा बहुमतका लागि ४७ मत चाहिन्छ । मुख्यमन्त्री उद्धव थापाको नेतृत्वमा सरकारलाई कांग्रेसका २९, माओवादी केन्द्रका १३, नेकपा एकीकृत समाजवादी पार्र्टीका ४ र जसपाको एक गरी ४७ सांसदको समर्थन छ । उनको विपक्षमा एमालेका ३९ (उपसभामुख बाहेक) र राप्रपाका ६ जना सांसद छन् ।