विराटनगर । नेकपा एमालेका अध्यक्ष केपी शर्मा ओलीले आगामी राजनीतिक प्रतिस्पर्धा सडक र चुनावी मैदानमा मात्र नभई सामाजिक सञ्जालमा समेत हुने भन्दै पार्टीका नेता–कार्यकर्तालाई सक्रिय हुन निर्देशन दिएका छन्।

इलाममा लोकतान्त्रिक आदिवासी जनजाति महासंघको बैठकलाई सम्बोधन गर्दै ओलीले सामाजिक सञ्जालमा हुने नकारात्मक प्रचारको प्रतिवाद गर्न कार्यकर्तालाई आग्रह गरे। उनले विगतका निर्वाचनमा एमालेले गरेका कामभन्दा सामाजिक सञ्जालमा फैलिएका भ्रम र गलत प्रचार बढी प्रभावकारी बनेको आफ्नो निष्कर्षसमेत दोहोर्‍याए।

ओलीका अनुसार एमालेले कृषि, पूर्वाधार र विकासका क्षेत्रमा गरेका कामबारे सकारात्मक सूचना प्रवाह गर्न पार्टीका कार्यकर्ता पर्याप्त सक्रिय हुन सकेका छैनन्। यही कमजोरीको फाइदा विपक्षी समूहले उठाएको उनको भनाइ छ।

ओलीले पार्टीका समर्थकहरूले सामाजिक सञ्जालमा सकारात्मक सामग्रीमा लाइक, कमेन्ट र सेयर गर्नसमेत कञ्जुस्याइँ गर्न नहुने बताए।

उनको तर्कमा, ठूलो संख्यामा समर्थकले कुनै सकारात्मक विषयमा प्रतिक्रिया जनाए त्यसले सामाजिक सञ्जालको बहसलाई प्रभावित गर्न सक्छ। तर संगठित रूपमा नकारात्मक टिप्पणी गर्ने समूह सक्रिय हुँदा एमाले समर्थकहरू पछि हट्ने गरेको उनले बताए।

आलोचना र गालीबाट नडराउन आग्रह गर्दै ओलीले गलत आरोपको जवाफ तथ्यका आधारमा दिनुपर्नेमा जोड दिए।

उनले ऐतिहासिक रूपमा नेपालीले देखाएको साहसको प्रसङ्ग जोड्दै सामाजिक सञ्जालमा एउटा स्टाटस लेख्न वा त्यसको प्रतिवाद गर्न डराउन नहुने सन्देश कार्यकर्तालाई दिए।

ओलीको पछिल्लो अभिव्यक्तिले एमालेले सामाजिक सञ्जाललाई आगामी राजनीतिक प्रतिस्पर्धाको महत्वपूर्ण मैदानका रूपमा हेर्न थालेको संकेत गर्छ।

पछिल्ला वर्षहरूमा राजनीतिक दलका गतिविधि, सरकारको कामकारबाही र नेताहरूको लोकप्रियता मापनमा सामाजिक सञ्जालको भूमिका बढ्दै गएको छ। यही कारण दलहरूले आफ्ना संगठनलाई डिजिटल माध्यममा समेत सक्रिय बनाउन थालेका छन्।

ओलीले भने सामाजिक सञ्जालमा आफूहरूको उपस्थिति कमजोर हुँदा विपक्षीको प्रचार हावी हुने दाबी गरेका छन्।

कार्यकर्तालाई सामाजिक सञ्जालमा सक्रिय हुन आग्रह गर्ने क्रममा ओलीले वर्तमान सरकारप्रति पनि कडा आलोचना गरे।

उनले सरकारलाई ‘कठपुतली’, ‘नक्कली’ र ‘असंवैधानिक’ जस्ता संज्ञा दिँदै सरकारले निर्वाचनको नाममा नाटक गरिरहेको आरोप लगाए। सरकार सञ्चालनको अनुभव र क्षमता नपुगेका व्यक्तिहरूले राज्य सञ्चालन गर्दा समस्या उत्पन्न हुने उनको दाबी थियो।

सरकारका कामकारबाहीलाई व्यंग्यात्मक शैलीमा टिप्पणी गर्दै ओलीले अनुभव र दक्षता नभएकालाई महत्वपूर्ण जिम्मेवारी दिँदा समस्या आउने बताए।

ओलीले बालेन शाह नेतृत्वको सरकारप्रति पनि असन्तुष्टि व्यक्त गरे। उनले सरकारका उपलब्धिलाई संयोगसँग तुलना गर्दै यसलाई कामभन्दा ‘भवितव्य’को परिणामका रूपमा चित्रण गरे।

उनले सरकारका गतिविधिबाट विचलित हुन आवश्यक नरहेको बताउँदै देश निर्माणको जिम्मेवारी एमाले र उसका कार्यकर्ताको पनि भएको धारणा राखे।

ओलीको सम्बोधनमा यसपटक सडकको राजनीतिक प्रतिस्पर्धासँगै फेसबुक र सामाजिक सञ्जालको बहसमा समेत एमालेले आफ्नो प्रभाव बढाउनुपर्ने रणनीतिक सन्देश स्पष्ट देखिन्थ्यो।

उनको जोड थियो- राजनीतिक विचार र पार्टीले गरेका काम जनतासम्म पुर्‍याउने माध्यम अब सभा, जुलुस र घरदैलो मात्र होइन, मोबाइलको स्क्रिन पनि हो। त्यसैले आगामी राजनीतिक प्रतिस्पर्धामा सामाजिक सञ्जालमा कसले आफ्नो कथा बलियोसँग प्रस्तुत गर्छ भन्ने विषय पनि उत्तिकै महत्वपूर्ण हुने देखिन्छ।