गौरादह, १७ साउन ।
झापाको गौरादह नगरपालिका वडा नम्बर ५ चप्रामारी स्थित ऐतिहासिक राधाकृष्ण मन्दिर र नवनिर्मित सामुदायिक सभाहल परिसरमा एक बृहत् सरसफाइ कार्यक्रम सम्पन्न भएको छ। लामो समयदेखि थुप्रिएको फोहोर र पलाएका झाडीका कारण कुरुप बनेको यस क्षेत्रलाई स्थानीय बासिन्दा र 'सारथी युवा क्लब गौरादह' को संयुक्त टोलीले सरसफाइ गरी चिटिक्क पारेको हो।

धार्मिक तथा सामाजिक दृष्टिकोणले महत्त्वपूर्ण मानिएको यस सार्वजनिक स्थलको संरक्षण र सौन्दर्यीकरणका लागि युवा तथा स्थानीय नागरिकहरू स्वतःस्फूर्त रूपमा सडकमा उत्रिएका थिए। फोहोरमैला व्यवस्थापन, झाडी फँडानी र मन्दिर परिसरको सरसफाइमा स्थानीय सामाजिक व्यक्तित्वहरू र युवाहरूको उत्साहजनक सहभागिता रहेको थियो।

उक्त सरसफाइ अभियानको संयोजन स्थानीय युवा तथा सामाजिक अभियन्ता कृष्ण तिवारीले गर्नुभएको थियो। कार्यक्रमलाई भव्य रूपमा सफल पार्न अहोरात्र खटिने सम्पूर्ण संघ–संस्था, युवा क्लबका प्रतिनिधि, सामाजिक व्यक्तित्वहरू तथा आम चप्रामारीबासीप्रति आयोजकले विशेष आभार समेत प्रकट गरेको छ।

उत्कृष्ट व्यवस्थापन भए प्रचुर सम्भावना
स्थानीयबासीका अनुसार चप्रामारीमा बनेको यो सुन्दर र भव्य सामुदायिक सभाहल यस क्षेत्रकै एक गौरवको संरचना हो। तर, यसको उचित हेरचाह र संरक्षण हुन नसक्दा यो ओझेलमा पर्ने खतरा बढेको थियो। यस कार्यक्रमका सहभागीहरूले यो सभाहलको उत्कृष्ट व्यवस्थापन र नियमित संरक्षण हुन सके चप्रामारी र आसपासका बासिन्दाका लागि विभिन्न सामाजिक, सांस्कृतिक तथा सार्वजनिक कार्यक्रमहरू सञ्चालन गर्न यो निकै प्रभावकारी र फलदायी हुने विश्वास व्यक्त गरेका छन्।

"समाजको सारथी बन्ने अभियानमा हाम्रो यो निरन्तर र इमानदार प्रयास हो," सारथी युवा क्लबका एक प्रतिनिधिले पर्दाफास डटकमलाई बताए। सार्वजनिक सम्पत्तिको रक्षा र सामाजिक उत्तरदायित्व वहन गर्ने यस्ता कार्यले समाजमा सकारात्मक ऊर्जा थपेको भन्दै स्थानीय बुद्धिजीवीहरूले समेत यो कार्यको उच्च प्रशंसा गरेका छन्। चप्रामारीको यो अभियानले आगामी दिनमा पनि निरन्तरता पाउने र हलको दिगो व्यवस्थापनका लागि सरोकारवाला निकायको ध्यान पुग्ने अपेक्षा गरिएको छ।