विराटनगरमा मोटरसाइकल दुर्घटना, सामाजिक अभियन्ताको मृत्यु
प्रकाशित मिति : भाद्र ०४ २०८२,बिहिबार
काठमाडौं – विराटनगरमा प्रहरीको सवारी जाँचको क्रममा भएको मोटरसाइकल दुर्घटनामा २८ वर्षीय सामाजिक अभियन्ता पुष्पकुमार चौधरीको मृत्यु भएको छ। चौधरी सुनसरीको बर्जु गाउँपालिका-६ का बासिन्दा थिए।
घटना गएराति करिब ८:२० बजे विराटनगर महानगरपालिका-४ स्थित दूधफारम चोकमा भएको हो। जिल्ला प्रहरी कार्यालय मोरङबाट खटिएको प्रहरी टोलीले ट्राफिक प्रहरीसहित सवारी जाँच गरिरहेको समयमा दुर्घटना घटेको हो।
प्रत्यक्षदर्शीका अनुसार, नेमुवातर्फ जाँदै गरेको मिनी ट्रकलाई प्रहरीले जाँचको लागि रोकेको थियो। सोही दिशाबाट तीव्र गतिमा आउँदै गरेको मोटरसाइकल ट्रकको पछाडिसँग ठोक्किएको थियो।
घाइते भएका चौधरीलाई तत्काल विराटनगरको नोबेल अस्पताल लगिएको थियो, जहाँ उपचारकै क्रममा उनको मृत्यु भएको प्रहरीले जनाएको छ। मृतक सामाजिक क्षेत्रमा सक्रिय थिए र उनको निधनले स्थानीय समुदायमा शोक फैलाएको छ।
प्रहरीले दुर्घटनामा संलग्न मिनी ट्रकका चालक ३१ वर्षीय सन्तोषकुमार आचार्यलाई नियन्त्रणमा लिएर थप अनुसन्धान गरिरहेको छ।
प्रतिक्रिया
