जापानका प्रधानमन्त्री शिगेरु इशिबाले आफ्नो सत्तारूढ **लिबरल डेमोक्रेटिक पार्टी (एलडीपी)**ले संसदका दुवै सदनमा बहुमत गुमाएपछि राजीनामा दिने घोषणा गरेका छन्। जुलाईमा भएको आम निर्वाचनमा पार्टीले ऐतिहासिक पराजय भोगेपछि केही हप्तामै उनले यस्तो निर्णय गरेका हुन्।

जापानी सञ्चारमाध्यमका अनुसार इशिबाले पार्टीभित्र बढ्दै गएको विभाजन रोक्नका लागि राजीनामा दिन लागेका हुन्। यद्यपि यसअघि उनले चुनावी हारका कारण राजीनामा दिने खबर अस्वीकार गर्दै, अमेरिकासँगको ट्यारिफ सम्झौता कार्यान्वयनमा ध्यान केन्द्रित गर्न चाहेको बताएका थिए।

गत अक्टोबरमा पदभार ग्रहण गरेका इशिबाले आफ्नो गठबन्धनले संसदमा बहुमत गुमाएपछि नीतिगत लक्ष्यहरू अघि बढाउन कठिनाइ भोगिरहेका थिए। विशेष गरी पार्टीभित्रका दक्षिणपन्थी विपक्षीहरूले जुलाईको चुनावी नतिजाको जिम्मेवारी लिन उनले राजीनामा दिनुपर्ने दाबी गर्दै आएका थिए।

प्रधानमन्त्री कार्यालयले अहिलेसम्म इशिबाको राजीनामासम्बन्धी समाचारमा औपचारिक टिप्पणी नगरेको भए पनि सरकारले आइतबार हुने पत्रकार सम्मेलनको पुष्टि गरेको छ। उक्त सम्मेलन प्रारम्भिक नेतृत्व चुनावको अघिल्लो दिन हुनेछ।

यो घटनाक्रम अमेरिकी राष्ट्रपति डोनाल्ड ट्रम्पले जापानी कार आयातमा कर घटाउने कार्यकारी आदेशमा हस्ताक्षर गरेको केही दिनपछि आएको हो। तर, दुई देशबीचको व्यापक व्यापार सम्झौता अझै टुंगो नलागेको जापानी भन्सार वार्ताकारहरूले बताएका छन्।