झापा । झापाको कमल गाउँपालिकाको भविष्यमा स्थानीय तहको स्वरूप परिवर्तन हुने विषयले पछिल्लो समय चर्चा पाएको छ। कमल गाउँपालिका छुट्टै नगरपालिका बन्ने हो वा दमक नगरपालिकासँग गाभिने हो भन्ने विषयमा सामाजिक सञ्जाल तथा स्थानीयस्तरमा विभिन्न चर्चा र हल्ला चलिरहेका बेला गाउँपालिका अध्यक्ष हुकुमसिंह राईले भने आधिकारिक प्रक्रिया र मापदण्डबिना कुनै निष्कर्षमा नपुग्न आग्रह गरेका छन्।

अध्यक्ष राईका अनुसार कमल गाउँपालिकालाई नगरपालिका बनाउन आवश्यक पर्ने कानुनी तथा प्रशासनिक मापदण्ड पूरा हुनुपर्नेछ। मापदण्ड पूरा भए छुट्टै कमल नगरपालिका बन्न सक्ने र पूरा नभए हालकै गाउँपालिकाको संरचना कायम रहने उनको भनाइ छ।

स्थानीय तहको पुनर्संरचनासँगै कमललाई दमकसँग गाभ्ने सम्भावना बारे समेत चर्चा हुन थालेको छ। भौगोलिक निकटता, पूर्वाधार, जनसंख्या तथा सेवा प्रवाहका दृष्टिले दमकसँगको सम्बन्धलाई लिएर विभिन्न कोणबाट बहस भइरहे पनि हालसम्म कमल गाउँपालिकालाई दमकमा गाभ्ने विषयमा कुनै आधिकारिक निर्णय भइसकेको देखिँदैन।

अध्यक्ष राईले सामाजिक सञ्जालमार्फत कमल गाउँपालिकाको नाम, सीमा वा स्वरूप परिवर्तनबारे फैलिएका अपुष्ट सूचनाप्रति ध्यानाकर्षण गराउँदै आधिकारिक निर्णय र कानुनी प्रक्रियाबिना गरिएका प्रचारमा विश्वास नगर्न आग्रह गरेका छन्।

उनले स्पष्ट रूपमा भनेका छन्, “कमल गाउँपालिका मापदण्ड पूरा भएपछि छुट्टै कमल नगरपालिका बन्न सक्छ। मापदण्ड पूरा नभएसम्म गाउँपालिका नै रहनेछ।”

स्थानीय तहको पुनर्संरचना संवेदनशील विषय भएकाले जनसंख्या, भूगोल, पूर्वाधार, आर्थिक तथा प्रशासनिक क्षमता लगायतका निर्धारित आधार पूरा गर्नुपर्ने हुन्छ। त्यसैले कमलको आगामी स्वरूप छुट्टै नगरपालिका बन्ने हो वा अन्य स्थानीय तहसँग समायोजन हुने हो भन्ने विषय सम्बन्धित कानुनी प्रक्रिया र सरकारी निर्णयबाट मात्रै टुंगो लाग्नेछ।

यसबीच ‘कमल नगरपालिका’ बन्ने चर्चा र ‘दमकसँग गाभिने’ सम्भावनाबारेको बहसले स्थानीय राजनीतिक वृत्त तथा सर्वसाधारणमा चासो बढाएको छ। तर अहिलेसम्मको अवस्थामा भने कमल गाउँपालिका यथावत् रहेको र कुनै औपचारिक निर्णय सार्वजनिक नभएको अध्यक्ष राईको भनाइबाट स्पष्ट हुन्छ।