गौरादहका २८ जना राप्रपा कार्यकर्ताले गरे पदीय जिम्मेवारी परित्याग
प्रकाशित मिति : पौष १० २०८१,बुधबार
झापा गौरादहका २८ जना राष्ट्रिय प्रजातन्त्र पार्टी (राप्रपा) का कार्यकर्ताहरूले सामूहिक रूपमा पदीय जिम्मेवारीबाट अलग भएको घोषणा गरेका छन्। जिल्ला, क्षेत्र, नगर, वडा, र टोल समितिमा रहेका यी कार्यकर्ताहरूले संगठनमा व्यक्तिवादी चरित्र हावी भएको, एकअर्काप्रति दोषारोपण गर्ने प्रवृत्ति बढेको, र नेतृत्व पक्षले सल्लाह-सुझावलाई बेवास्ता गरेको भन्दै यो कदम उठाएको जनाएका छन्।
पदीय जिम्मेवारी परित्याग गर्नेमा श्री तामाङ, युवराज चुँडाल, खेमराज तिम्सिना, देवेन्द्र खड्का, मित्रबहादुर वस्नेत, भुपेन्द्र रोक्का, नरेश तुम्वाम्फो, पूर्णबहादुर श्रेष्ठ, बेङ्गुलाल ताजपुरिया, समीर बस्नेत, शिवशंकर दाहाल, हरिकुमार सुब्बा, ज्ञानबहादुर कटुवाल, भोला नेपाल, टेकलाल राजवंशी, टेकप्रसाद अधिकारी, कृष्ण बस्नेत, लक्ष्मी भण्डारी, खेमप्रसाद पाण्डे, गणेशबहादुर दाहाल, भीमबहादुर श्रेष्ठ, चन्द्रजंग कार्की, कुमार कटुवाल, बद्री संग्रौला, जुना रोक्का, नेत्रबहादुर दाहाल, र ज्ञानेन्द्र शिवा रहेका छन्।
यस घोषणाले पार्टीको जिल्ला र क्षेत्रीय समितिहरूमा प्रभाव पारेको छ भने गौरादह नगर, वडा, र टोल समितिहरू लगभग रित्तिएका छन्। कोशी प्रदेश सरकारका सभामुख तथा पार्टीका पूर्व जिल्ला अध्यक्ष अम्बरबहादुर विष्टको बसोबास रहेको गौरादह नगरपालिकामा यस कदमले राप्रपाको संगठनलाई गम्भीर चुनौती दिएको छ।
पछिल्लो स्थानीय निर्वाचनमा गौरादह नगरपालिकामा राप्रपा चौथो स्थानमा रहेको थियो। मेयर पदका उम्मेदवार गोपालप्रसाद पौड्यालले १,५९० र उपमेयरका उम्मेदवार भरिपूर्ण राईले १,६२४ मत प्राप्त गरेका थिए।
यस घटनाले पार्टीमा पुनरावलोकन र सुधारको खाँचो रहेको स्पष्ट पारेको छ।
प्रतिक्रिया
